Un empregado do Casino frustra un roubo e logra reter o ladrón, un 'coñecido' da Policía
Por Natalia Puga
Un camareiro do Casino de Pontevedra logrou reter o xoves a un suposto ladrón ao que sorprendeu cando intentaba roubarlle un unha tableta electrónica e abrir a caixa rexistradora. Despois dun forcexo entre ambos os dous e de que o traballador evitase a fuxida, o rapaz foi detido e este venres pasará a disposición xudicial.
Fontes policiais confirmaron que o detido é un veciño de Pontevedra de 25 anos coñecido das forzas de seguridade polos seus antecedentes. Nos últimos meses foi arrestado por roubar teléfonos ou por intentar desvalixar establecementos de hostalaría.
A súa última detención foi por un delito de roubo con violencia e aconteceu nas instalacións do Liceo Casino da rúa Manuel Quiroga, no casco histórico de Pontevedra, sobre as 18.50 horas deste xoves 15 de agosto.
Segundo denunciaron dous traballadores do Casino, o rapaz entrou coa escusa de visitar a exposición de pintura que hai nas instalacións. Nun primeiro momento, non lles chamou a atención a visita, pero empezaron a desconfiar porque a súa estanza se prolongaba. Un dos empregados fixo un percorrido polas instalacións e encontrouno no soto. Segundo puido saber máis tarde a Policía, accedera á zona de vestiario do persoal.
A continuación o mozo dirixiuse á cafetaría e alí foi sorprendido polo camareiro no momento no que intentaba apoderarse dunha tablet da marca Samsung da súa propiedade e doutros efectos. Ao parecer, intentou abrir a caixa rexistradora, pero sen éxito e cando chegou o camareiro, reaccionou de forma agresiva, agrediuno e iniciouse un forcexo entre ambos os dous.
Mentres este empregado o retiña, unha compañeira alertou a Policía Nacional. Os axentes chegaron pouco despois e detivérono. Recollen na súa parte de actuacións que se encontraba en estado moi agresivo.
O rapaz foi trasladado á Comisaría da Policía Nacional, onde se investiga agora se tamén tería cometido outro roubo no mesmo establecemento o día anterior.