O barrio de San Roque en Vilagarcía celebra a festa de 'San Roquiño o pequeno'
Por Aitana Vidal
A festa apoderouse este 15 de agosto do barrio de San Roque en Vilagarcía de Arousa. Como é tradicional, os actos conmemorativos do 'San Roquiño o pequeno' iniciáronse coa misa na capela. A continuación, numerosos veciños sumáronse á procesión na que participou o alcalde de Vilagarcía, Tomás Fole, con outros concelleiros da corporación.
Tras o acto relixioso, a festa centrouse no aspecto culinario con degustación de empanada e viño do país. Durante a tarde, 'Viñagarcía' na praza da Peixería e a discoteca móbil foron os protagonistas antes da Festa da auga que, durante este venres 16 de agosto, non deixará seco ningún paseante polas rúas de Vilagarcía.