O baile da Peregrina, suspendido pola COVID-19: "Non queda máis remedio", di o Liceo Casino
Por Alejandro Espiño
Unha das estampas máis tradicionais do verán pontevedrés non se repetirá. Polo menos, ata 2021. Trátase do baile da Peregrina, organizado cada mes de agosto polo Liceo Casino. A entidade decidiu cancelar a súa celebración pola COVID-19.
O presidente do Liceo Casino, Jaime Olmedo, confirmou a PontevedraViva que a decisión de suspender este evento foi adoptada pola xunta directiva da entidade, como consecuencia das restricións que impuxo a pandemia do coronavirus.
Coas normas fixadas pola Xunta, o aforo para o baile quedaba reducido a unhas 1.000 persoas o que, xunto coa preceptiva distancia de seguridade entre os asistentes e a obrigatoriedade de levar máscara, provocaría que o evento "quedase devaluado".
"Ou o faciamos como edicións anteriores ou mellor non facelo", explicou Olmedo, que asegura que non se barallou aprazalo para outra data porque "é a festa da Peregrina", polo que "non tería sentido" organizalo máis adiante. "O mellor é deixalo para 2021", engade.
Ademais, de seguir adiante co baile, o Liceo Casino teríase que enfrontar a outro problema, xa que o ano pasado a asistencia foi dunhas 4.000 persoas, polo que a directiva tería que decidir "quen vén e quen non".
"Para facer unha cousa mal feita mellor suspendelo, non queda máis remedio", sinalou o responsable da entidade, que entende que coas actuais restricións "quedaría un produto moi distinto ao que están afeitos os socios".
Por este mesmo motivo, o Liceo Casino suspenderá todos os seus bailes durante os próximos meses, aínda que manterá outras actividades nas súas sedes e estuda, entre outras iniciativas, organizar "ceas tranquilas" nas súas instalacións.
Durante o baile da Peregrina do pasado ano, once mozas -acompañadas dos seus pais- realizaron a súa presentación en sociedade nun evento que, como é habitual cada ano, celebrouse no parque de verán que o liceo Casino ten na Caeira.