Condenan a dous anos de cárcere un pirómano reincidente por causar 12 incendios nun ano
Por Natalia Puga
A Sección Cuarta de la Audiencia de Pontevedra condenou a dous anos de prisión a un pirómano diagnosticado como autor de dous delitos continuados de incendios forestais por ocasionar doce lumes forestais ao longo dun ano, entre setembro de 2011 e setembro de 2012.
A sentenza ten en conta a circunstancia eximente incompleta de alienación mental, pois no momento dos feitos o condenado, G.V.C., "padecía un trastorno de control de impulsos-piromanía" que diminuíu as súas facultades volitivas e, ademais, "presenta unha capacidade intelectual límite". No momento de provocar estes incendios non estaba sometido a tratamento farmacolóxico nin psicolóxico de ningún tipo, pero si o estivo no ano 2009 tras ser condenado pola súa actividade incendiaria.
Ao mesmo tempo, a sentenza ten en conta a circunstancia agravante de reincidencia, pois este home de 47 anos nacido en Agolada xa fora condenado por un delito de incendio pola mesma Sección Cuarta de la Audiencia no ano 2009. Os lumes polos que acaba de ser condenado provocounos na bisbarra do Deza. O primeiro, o 14 de setembro de 2011 e o último, o 7 de setembro de 2012.
Deberá pagar á Xunta os gastos dos lumes e a Telefónica porque tres dos incendios afectaron a cableado e cortaron o subministro
Ademais de dous anos de cárcere, o home foi condenado ao pagamento dunha multa de 1.350 euros e a indemnizar a Xunta de Galicia con 27.967,65 euros polos gastos ocasionados pola extinción dos doce incendios.
Tamén deberá indemnizar donos dos terreos queimados e á compañía Telefónica. No caso desta empresa, con 8.926,36 euros porque en tres dos lumes provocados se queimaron un total de 875 metros de cables, o que ocasionou a interrupción do servizo telefónico e de Internet nas poboacións afectadas.
O propio acusado recoñeceuse autor dos feitos, de modo que evitou que se celebrase o xuízo con xurado ao que ía ser sometido e que se ditase unha sentenza coa súa conformidade.