COGAMI alerta dos efectos da crise sanitaria nas persoas con discapacidade
Por Redacción
As 53 entidades que forman parte no movemento asociativo da Confederación Galega de Persoas con Discapacidade (COGAMI) mostran a súa preocupación ante o impacto do coronavirus nas persoas con discapacidade.
Así o expresaron na xuntanza mantida dentro da súa Asemblea Xeral Ordinaria, que este ano tivo que ser online, e na que abordaron os efectos da pandemia da COVID-19 nas persoas con discapacidade, un colectivo xa de por si castigado nas crises precedentes.
COGAMI ten presenza na comarca de Pontevedra a través das asociacións Amizade (Asociación de persoas con discapacidade da comarca de Pontevedra), ALCER Pontevedra (Asociación para a Loita Contra as Enfermidades do Ril de Pontevedra) e Anduriña (Asociación de Persoas con Discapacidade do Salnés), ademais das 14 entidades que prestan o seu servizo para toda a provincia.
COGAMI pide que se teña en conta a vulnerabilidade das persoas con discapacidade, xa que a actual crise de saúde pública está provocando unha crise social e económica de efectos devastadores para as persoas con discapacidade e as familias.
Desde COGAMI lémbrase que o colectivo de persoas con discapacidade ve incrementada a situación de indefensión a consecuencia das medidas de illamento decretadas e tralo peche dos centros ocupacionais, de día, sociais, educativos, xunto coa práctica desaparición das súas redes de apoio unido ás consecuencias económico sociais do momento.
O presidente da Confederación Galega, Anxo Queiruga, lembra que as propias asociacións tiveron que facer un esforzo extraordinario para continuar coa "prestación dos servizos de atención a persoas con discapacidade e familias, aínda que utilizando fórmulas alternativas ás habituais,como a atención telefónica, as videochamadas, visitas a domicilios, entrega de medicación, compra de alimentos e o deseño e posta en marcha de plans de traballo para que as persoas os poidan realizar dende as casas".
Con todo, estas medidas son insuficientes unha vez se retome a actividade habitual, para o cal reclama o deseño de protocolos de prevención a corto e medio prazo nos centros de atención diúrna e dotalos de equipos de protección individual (EPIs) e test rápidos de detección da COVID-19.
A interrupción dos prazos administrativos é un tema especialmente preocupante para este colectivo, xa que está a deixar fóra da asistencia domiciliaria a moitas persoas que o precisan pero están pendentes da valoración do seu grao de discapacidade. Por este motivo, solicitan ás autoridades públicas unha resposta prioritaria para retomar as valoracións de dependencia e discapacidade e a xestión de prestacións.
Esta petición ás administracións públicas esténdese á necesaria participación das persoas con discapacidade e as familias, a través das súas organizacións representativas, nos plans de reconstrución social e económica que se desenvolvan tanto a nivel europeo, estatal e autonómico na volta á normalidade. Reclámase, así mesmo, que non se recorte, segundo adiantou o Goberno central, o recadado do IRPF que se destina para fins sociais.
Relacionadas:
-
COGAMI e 160 empresas de Pontevedra empregaron persoas con discapacidade
Por Redacción |
-
Quince persoas con discapacidade fórmanse en Pontevedra para exercer como auxiliares de servizo
Por Redacción |
-
Amizade reclama que a discapacidade non sexa un motivo de discriminación no acceso aos serivizos sanitarios
Por Redacción |
-
A Xunta reforza o Servizo de Axuda no Fogar na provincia
Por Redacción |
-
COGAMI inicia un novo curso de inserción laboral en Monte Porreiro
Por Boris Rodríguez Pintos |
-
A ría de Pontevedra, un campo de regatas inclusivo
Por Redacción |