A Cámara de Comercio lanza tres proxectos para estimular a economía
Por Redacción
A Cámara de Comercio de Pontevedra, Vigo e Vilagarcía de Arousa presentou tres novos proxectos destinados a estimular a economía da demarcación, especialmente dirixidos a dar apoio ao comercio e os servizos de proximidade, fundamentalmente ás pequenas e medianas empresas.
En concreto, o ente cameral anunciou a posta en marcha dun 'Open Marketplace' que permitirá unha rápida incorporación ao e-commerce de todos os negocios e empresas asociadas á Cámara que queiran sumarse ao proxecto; o desenvolvemento dun Estudo de Situación para valorar a situación real do comercio que poida servir de base a novas estratexias de actuación para revitalizar a actividade; así como o impulso, xunto con Cámara de España e a Secretaría de Estado de Comercio, dun Selo de 'Confianza Covid-2019'.
Estas iniciativas foron presentadas este venres nunha rolda de prensa celebrada na sede cameral, que estivo presidida de forma telemática por José García Costas, e na que participaron de maneira presencial o vicepresidente primeiro da entidade cameral, José Manuel Fernández Alvariño e o vogal do Comité Executivo da Corporación, Ramón Correa Fernández.
O presidente da Cámara, José García Costas, afirmou que estes tres programas "van concentrar o esforzo da Cámara para apoiar a rápida recuperación do comercio, impulsando as súas vendas e axudando a recuperar a confianza do consumidor".