Caldas de Reis rozará ata xullo todas as estradas, pistas e camiños do municipio
Por Redacción
Desde hai un mes o Concello de Caldas de Reis leva realizando labores de roza e limpeza das estradas, pistas e camiños do municipio que unen os núcleos rurais. Este traballo, coordinado a través dunha estrita planificación, continuará ata o mes de xullo.
As actuacións estanse desenvolvendo a bo ritmo. Comezaron polas parroquias de Saiar e de Godos, onde están a punto de rematar. Os traballos continuarán en Bemil e Carracedo, posteriormente actuarase en San Clemente e San Andrés e finalizarase en Santa María, onde xa se rozou unha parte, e en Arcos da Condesa.
O programa execútase con maquinaria e persoal municipal, aínda que nalgún caso as actuacións se complementan co apoio de medios externos contratados. Precisamente, o Concello está solicitando a colaboración das diferentes comunidades de montes do municipio co obxectivo de complementar, axilizar e optimizar o traballo realizado.
Con este plan municipal o Concello busca manter no mellor estado posible os diferentes viais do municipio nunha época do ano na que a vexetación crece de maneira especial.
Deste modo, as rozas pretenden mellorar as comunicacións entre os núcleos e lugares parroquiais, mellorar a visibilidade e a seguridade viaria, ademais de previr incendios, o que mellorará a calidade de vida da veciñanza do rural e de todo o termo municipal.
Ademais, o plan de roza complementarase con tarefas especiais de limpeza de cunetas coa finalidade de que a rede viaria se manteña en perfectas condicións durante todo o ano.
O concelleiro de Obras, Manuel González, puxo de manifesto o "esforzo inxente" que o Concello realiza na execución deste plan tan importante cada ano para a veciñanza das parroquias debido á enorme cantidade de quilómetros sobre os que é preciso actuar.
"É un plan que xa iniciamos hai un mes e que desenvolvemos con mimo e moita planificación para chegar a todos os lugares e alcanzar os mellores resultados", engadiu González.
Pola súa banda, o edil de Medio Rural, Carlos Ortigueira, explicou que se están avaliando coa veciñanza as necesidades de roce das parroquias e invitou a colaborar nestas tarefas ás comunidades de montes de Caldas, como xa está facendo persoal da de Saiar.
Relacionadas:
-
Avanza o proxecto para pavimentar a pista de acceso a Outeiro en Caldas de Reis
Por Redacción |
-
A Xunta e a Deputación continúan coa limpeza das estradas
Por Redacción |
-
Caldas completa a rede de saneamento no núcleo de Segade de Arriba
Por Redacción |
-
Plan de bacheo para rematar coas fochancas en todas as vías de Caldas
Por Redacción |
-
Adxudicadas en Caldas as obras de reposición do muro de contención de Segade
Por Redacción |
-
Augas de Galicia limpa o curso dos ríos que atravesan Caldas e Portas
Por Redacción |
-
Caldas arromba as súas zonas verdes ante a autorización de posibles saídas
Por Redacción |