A Federación de Hostalería de Pontevedra ofrece aos seus asociados unha app gratuíta que quere servir de axuda para reactivar e promocionar estes establecementos. A aplicación 'Hostalería de Pontevedra' pódese descargar tanto en dispositivos con sistema operativo Apple como nos dispositivos con sistema Android.

Desde este 4 de maio, o sector da hostalería e restauración pode recibir pedidos por teléfono ou vía telemática se dispón da mesma, que se poden recoller no propio local, respectando sempre as normas de seguridade e hixiene. Pola súa banda os clientes que a descarguen, poderán localizar os establecementos que ofrezan os servizos permitidos ata a data e a medida que se vaian ampliando as posibilidades no sector, a aplicación tamén irá ofrecendo novos apartados de información e promoción.

Ademais desa promoción e información para profesionais e clientes, con esta iniciativa a Federación pretende incentivar o consumo neste sector que consideran é "unha das actividades económicas máis duramente castigadas pola pandemia".