As rozadoras chegan ás prazas do Teucro e A Ferrería
Por Manu Otero
Pontevedra segue dando pasos cara á normalidade. Moitos comercios retoman este luns a súa actividade e dentro dunha semana, se a evolución sanitaria segue sendo favorable, serán máis empresas as que volvan entrar en funcionamento. Para iso, os operarios de limpeza municipal afánanse estes días en poñer a punto os espazos públicos.
A falta de movemento de persoas favoreceu a expansión da natureza e entre as xuntas do empedrado das prazas da cidade crecía con forza a herba. Unha situación que propiciou unha imaxe nada habitual, a dos xardineiros do Concello equipados coas súas rozadoras segando os lugares máis emblemáticos da zona vella como as prazas da Ferrería ou do Teucro.
Desde finais de abril, o goberno local ten en marcha unha mobilización de limpeza que levou aos operarios municipais a poñer a punto zonas como a contorna de Santa María, a Alameda ou os barrios de Mollabao, A Parda ou Monte Porreiro. O obxectivo é ter a cidade no mellor estado posible para a volta á normalidade despois do confinamento provocado pola crise sanitaria da COVID-19.
Relacionadas:
-
Roza e limpeza das sendas da Xunqueira de Alba para facilitar os paseos
Por Redacción |
-
Pontevedra inicia o expediente do contrato de mantemento de espazos públicos no rural
Por Oskar Viéitez |
-
Pontevedra reforza a desinfección de colectores
Por Redacción |
-
Reforzan os 'zafarranchos' de limpeza nos barrios ata final de ano
Por Redacción |