Sesións de contacontos, vía telemática, para visibilizar o empoderamento da muller en Poio
Por Redacción
A pandemia do coronavirus obrigou a interromper o proxecto 'Mulleres de Poio 2020', unha proposta que se desenvolvía con motivo do Día da Muller a través da concellería de Igualdade, que dirixe Silvia Díaz.
Nas actividades contempladas neste proxecto, ademais dunha homenaxe a cinco veciñas do municipio, estaban previstas sesións de contacontos nos centros educativos do Concello. Nestes encontros co alumnado queríase mostrar a valía do labor desenvolvido polas cinco mulleres homenaxeadas pertencentes ás cinco parroquias de Poio e comprobar a súa repercusión social, vital e familiar.
Agora, a concellería trasladará ás direccións dos colexios que proximamente poderán acceder por vía telemática a estas sesións de contacontos gravadas polos integrantes de Polo Correo do Vento apoiándose no libro 'Mulleres de Poio 2020', que conta con ilustracións de Tania Solla.
Ademais dos centros educativos, este contido poñerase a disposición pública a través das redes sociais. O contido destas historias ofrece perspectivas sobre o empoderamento da muller en Poio ao mesmo tempo que promove cambios de valores no ámbito educativo e social, co obxectivo de promover a igualdade e favorecer o encontro entre distintas xeracións, de maneira que o alumnado poida coñecer a historia dos seus maiores.