O estudo epidemiolóxico do coronavirus arranca sen incidencias en Pontevedra
Por Redacción & Diego Torrado
Centros de saúde de Pontevedra comezaron xa a realizar as probas ás 2.700 persoas que, no marco da cidade, foron incluídas no estudo epidemiolóxico deseñado pola Xunta de Galicia para coñecer cal foi a incidencia do coronavirus.
Os primeiros pacientes foron testados, entre outros lugares, nos centros de saúde Virxe Peregrina, A Parda e Lérez, nos que se habilitaron carpas. Todos eles forman parte da primeira fase deste estudo que, en toda Galicia, realizará mostras a 50.925 persoas.
Con esta investigación, Sanidade pretende estimar a prevalencia da inmunidade fronte á COVID-19 nas diferentes localidades galegas, definir cal é a súa repercusión de acordo ás variables de sexo ou idade, e, finalmente, monitorar a evolución da epidemia durante o período de tempo en que se produza a recollida da información.
A poboación obxecto de investigación, na que os cidadáns participarán de maneira voluntaria, foron elixidas aleatoriamente por sexo, idade e lugar de residencia.
Cada centro de saúde de Pontevedra terá asignada unha poboación concreta para estudar, coa que contactará telefonicamente.
Ás persoas que entren no estudo daráselles unha cita para que acudan ao seu centro de saúde para tomarlles a mostra mediante unha punción dactilar. Entre 15 e 20 minutos despois coñecerase o resultado, que se notificará ao paciente nun prazo máximo de 48 horas.
No caso de dar positivo, as autoridades sanitarias realizarán unha proba PCR para confirmalo e seguirase o criterio clínico.
Relacionadas:
-
Apenas un 2% dos pontevedreses xerou anticorpos contra o coronavirus
Por Alejandro Espiño |
-
"Despois de once días de incerteza conseguín saber o resultado do test PCR"
Por Marisa Ciordia |
-
O Sergas inicia este xoves en Pontevedra o estudo epidemiolóxico do coronavirus con 2.700 test
Por Oskar Viéitez |
-
Galicia fará as probas do coronavirus a 100.000 galegos para estimar a poboación "inmunizada"
Por Alejandro Espiño |