Deteñen dous gardas civís nunha operación contra o narcotráfico en Arousa
Por Natalia Puga
Un espectacular operativo contra o tráfico de drogas desenvolvido durante toda a xornada deste mércores na comarca de Arousa deixou un balance de, ata o momento, tres detidos, dos cales dous son axentes da Garda Civil. Están detidos polos supostos delitos de suborno ('cohecho') e de revelación de segredos por 'axudar' dende dentro a narcotraficantes para eludir as forzas de seguridade.
Os arrestos realizounos o Equipo Contra o Crime Organizado (ECO) da Garda Civil no marco dunha intervención que incluíu o uso dun helicóptero e de varias patrullas por terra. Nos días previos xa se producira unha importante presenza policial na comarca
Polo menos unha das tres detencións produciuse no Concello de Vilanova de Arousa pola tarde, pero o operativo desenvolveuse durante todo o día. O terceiro detido a maiores dos axentes da Garda Civil é veciño da comarca e supostamente estaba relacionado previamente co narcotráfico.
Un dos gardas detidos é D.F.C., veciño de San Vicente do Mar, no Grove, aínda que non traballa no destacamento do Instituto Armado desta localidade, senón na Comandancia de Pontevedra. Na súa vivenda interviuse abundante material informático que podería revelar a maneira en que axudaba os narcotraficantes a coñecer as operaciós nen marcha pola Garda Civil.
O amplo despregamento policial chamou a atención dos veciños a primeira hora da tarde, cando máis dunha decena de axentes confluíron na zona das Sinas e se despregou tamén un helicóptero nas inmediacións.
Testemuñas presenciais relataron que os axentes levaban as armas á vista e o rostro tapado por pasamontañas (unha precaución habitual neste tipo de corpos policiais de investigación especializada) e desprazábanse en vehículos camuflados.
Relacionadas:
-
Dous ex gardas civís irán a xuízo por ser 'topos' de narcotraficantes
Por Natalia Puga |
-
Ingresan en prisión os dous gardas civís detidos como 'toupas' de narcos
Por Redacción |
-
A Garda Civil estima que os dous axentes detidos foron 'topos' de narcos un tempo "bastante limitado"
Por Redacción |
-
Un detido nunha espectacular operación contra el narcotráfico en Vilanova
Por Natalia Puga |