Multado con 3.000 euros por provocar un caos de circulación ao retirar sinais de tráfico
Por Natalia Puga
A Policía Local de Pontevedra denunciou un veciño da zona de Pontemuiños por retirar a sinalización provisional que formaba parte dun dispositivo especial de tráfico e, con esta acción, provocar un caos circulatorio.
Os feitos aconteceron o 23 de xullo sobre as 14.15 horas, mentres se celebraba na piscina olímpica de Pontemuiños el Campeonato de España de Natación. Ante a previsión dunha importante afluencia de vehículos á zona, a Policía Local establecera un dispositivo especial que reordenaba o tráfico, deixaba algunhas rúas cun só sentido circulatorio e desviaba os condutores por outras vías.
Todo o operativo estaba sinalizado con valado, conos e sinais provisionais. Nun momento dado, un veciño da zona retirou un cono extraíble e un sinal de circulación prohibida co seu mastro que prohibía dirixirse dende a estrada Pontevedra-Marín cara á rúa Matos de Arango. Levouse tamén outro valado e outro sinal de prohibido o paso que indicaba que se non podía xirar cara á rúa Camelias.
Os feitos presenciounos un voluntario de Protección Civil, que chamou a atención do veciño en cuestión, de 61 anos, pero este desoíu as indicacións e levouse a sinalización consigo. Nese momento, xerou confusión entre os condutores e houbo que regular o tráfico manualmente.
A Policía Local localizou o seu domicilio situado na zona, pero o home non estaba. De todos os xeitos, un familiar entregoulles parte desa sinalización subtraída, que estaba gardada no baixo do inmoble.
Por estes feitos, foi denunciado por unha infracción grave que leva consigo unha sanción de 3.000 euros. A multa non é firme.