Seis meses de cadea por dous roubos frustrados en furgonetas da avenida de Lugo
Por Natalia Puga
A Sección Segunda da Audiencia Provincial de Pontevedra condenou a seis meses de prisión cada unha a tres mulleres por dous roubos frustrados en dúas furgonetas estacionadas na avenida de Lugo sobre as 00.30 horas do 7 de abril de 2010.
O Xulgado do Penal número 3 de Pontevedra impuxera a unha delas unha pena de nove meses pola súa reincidencia neste tipo de delitos, pero o tribunal provincial igualoulle a súa condena á dos seus cómplices.
A condena é por un delito continuado de roubo con forza en grao de tentativa e inclúe o pagamento dunha indemnización entre as tres de 194,74 euros ao propietario dunha das furgonetas e de 354 euros ao outro.
Unha das procesadas, á que finalmente se reduciu a pena de nove a seis meses, foi condenada previamente, entre outra sentenzas, polo Xulgado do Penal número dous de Pontevedra en abril 2008, como autora dun delito de roubo con forza á pena dun ano e tres meses de prisión.
Esa noite as tres actuaron xuntas e "postas de común acordo e guiadas dun ánimo de enriquecemento a custa do alleo", violentaron a porta corrediza lateral do lado dereito dunha furgoneta Citroën que se encontraba estacionada na avenida de Lugo. Non chegaron a acceder ao seu interior nin apoderarse de ningún efecto, pero ocasionaron danos por 354 euros.
A continuación violentaron a porta traseira dereita dunha furgoneta Ford Courier, accederon ao seu interior e subtraeron 17 estoxos de aneis de cores, 45 fundas de silicona para distintos modelos de teléfonos móbiles, unha pistola de plástico de xoguete, tres caixas de contas para facer colares e dúas caixas de pendentes. Non lograron levarse os obxectos malia que si os colleron porque as sorprendeu unha patrulla da Policía Nacional, pero si causaron danos no vehículo por 194,70 euros.