Editan unha guía práctica para resolver as dúbidas dos xuíces durante o estado de alarma
Por Oskar Viéitez
A Sala de Goberno do Tribunal Superior de Xustiza de Galicia redactou unha guía práctica de funcionamento de xulgados e tribunais mentres dure o estado de alarma.
A intención desta guía é responder as preguntas máis frecuentes de xuíces e maxistrados, por exemplo "Como debe prestarse a garda? Vale por videoconferencia? Onde debe sentar a un detido?".
Así, aténdese a cuestións como o réxime de apertura dos xulgados e tribunais respondendo a cuestións tan curiosas como: Pódese pechar o xulgado e deixar unha nota para atención telefónica ou casos urxentes?. A resposta é negativa xa que as unidades xudiciais deben permanecer abertas ao público para a práctica das actuacións urxentes e inaprazables que acordou o Goberno vía Real Decreto. "Baixo ningún concepto cabe o peche dun órgano xudicial que non fose acordado pola autoridade sanitaria ou polo Tribunal Superior de Xustiza de Galicia", di esta guía.
Outras dúbidas que resolve o alto tribunal galego neste documento é se se pode acordar unilateralmente o peche do xulgado por positivo de coronavirus dun funcionario, algo que non se poderá facer "salvo disposición da autoridade sanitaria competente".
Tamén lembra o réxime de quendas establecidas, así como os servizos mínimos en materia de persoal en cada xulgado e os funcionarios que están excluídos desta medida.
Igualmente detállase a regulación do acceso por parte da cidadanía ás sedes xudiciais ou asuntos como a presentación de escritos, notificacións, o uso do sistema LexNet e a suspensión de prazos procesuais.
Finalmente, a guía contesta a todas as cuestións básicas no caso de que un maxistrado se infecte por coronavirus.