ADOS emitirá xustificantes ás persoas que acudan a doar sangue para evitar que sexan sancionados
Por Diego Espiño
A Axencia de Doazón de Órganos e Sangue (ADOS) transmite unha mensaxe de "serenidade" ante a alerta sanitaria pola crise do coronavirus Covid-19. Coas reservas en "niveis normais", piden que se manteñan as doazóns de sangue durante estas semanas pero que se fagan "de maneira tranquila e progresiva".
"Non necesitamos que haxa un aluvión", sinalan desde o ADOS, que mantén os horarios de atención nas súas sedes, no caso de Pontevedra na caseta instalada no exterior do Hospital Provincial.
A prevención ante o coronavirus tomou especial protagonismo, adoptando diversas medidas de seguridade e prevención para a tranquilidade de doantes e dos profesionais sanitarios. Ademais, se existe algunha dúbida pódese realizar previamente o test de autoexclusión do Covid-19 habilitado polo Sergas.
É certo que coa restrición das actividades cirúrxicas rutineiras, as necesidades de sangue nos hospitais reducíronse, pero "non significa que non haxa quen o necesite porque o maior consumo de sangue agora mesmo nos hospitais son os pacientes oncolóxicos, e os oncolóxicos son como crónicos, mentres estean co tratamento van necesitar sangue", sinalan desde a axencia de doazón. Con todo insisten na idoneidade de que as doazóns sexan dosificadas, xa que a persoa que acuda agora non poderá volver facelo en 3 ou 4 meses.
Por ese motivo acudir con cita previa é a opción máis aconsellable, aspecto que do mesmo xeito que calquera dúbida que poida xurdir é posible resolver chamando ao 881 54 69 00.
Ademais, ante o temor de sufrir sancións no caso de ter que desprazarse para acudir aos centros de doazón mentres siga en vigor o estado de alarma, desde o ADOS "o que imos facer é emitir un xustificante ás persoas que acudan a doar", confirman para maior tranquilidade das persoas interesadas en colaborar.
Relacionadas:
-
ADOS agradece aos doantes que sigan mantendo o seu xesto solidario nestes momentos
Por Redacción |
-
Pontevedra rexistra 59 positivos por coronavirus, once no hospital e 48 nos seus domicilios
Por Alejandro Espiño |
-
As probas rápidas para detectar o coronavirus desde o coche faranse tamén en Pontevedra
Por Alejandro Espiño |
-
Colas de dez minutos para entrar nos supermercados do centro da cidade
Por Manu Otero & Diego Torrado |
-
Sanidade adquire unha unidade móbil para as doazóns de sangue na comarca de Pontevedra
Por Redacción |
-
Pontevedra estrea un novo local de doazón de sangue situado na Praza do Hospital
Por Redacción |