Abre o prazo de inscrición para os campamentos polideportivos de Príncipe Felipe
Por Redacción
A Deputación de Pontevedra abriu este martes, 25 de febreiro, o prazo de inscrición para que os nenos da provincia poidan anotarse nos campamentos polideportivos de Príncipe Felipe, actividade que organiza a institución destinada a rapaces nados entre os anos 2006 e 2013, ambos incluídos.
Este programa, conformado por seis quendas, ofrece a posibilidade de que 300 nenos gocen do seu tempo libre no verán, participando en actividades de carácter lúdico e deportivo que contribúan ao seu enriquecemento persoal.
O campamento incorpora saídas ao medio natural, tiro con arco, actividades acuáticas e obradoiros.
As persoas interesadas poderán formalizar a súa inscrición ata o 16 de marzo.
As solicitudes deberán presentarse preferiblemente por vía electrónica a través do formulario normalizado, dispoñible na sede electrónica da Deputación.
O número de prazas ofertadas é de 50 por quenda e o seu prezo será de 125 euros por neno, habendo un desconto do 20% para familias numerosas con tres fillos e dun 30% para familias numerosas con máis de 3 fillos. As prazas adxudicaranse mediante un sorteo cuxa data e o resultado publicaranse na web.
A primeira das quendas comezará o 6 de xullo e alongarase ata o 11 de xullo.
A segunda arrancará o 13 e rematará o 18 de xullo; a terceira terá lugar do 20 ao 25 de xullo; a cuarta, do 3 de agosto ao 8 do mesmo mes; a quinta, do 10 ao 15 de agosto, e a sexta do 17 ao 22 de agosto.