Medio cento de familias, en listaxe de agarda en Cambados para conseguir composteiro
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Con motivo da nova campaña sobre compostaxe impulsada pola Deputación de Ponteverda os cambadeses encontraron estes días na feria do concello unha carpa informativa para dar a coñecer o novo Plan Revitaliza.
Mestras e mestres composteiros foron os encargados de explicar o proceso tanto dos depósitos individuais destinados a zonas rurais coma dos centros de compostaxe comunitaria (CCC) das zonas urbanas. Estas actividades informativas pretenden impulsar a compostaxe coma un modelo de xestión de lixo ambientalmente sustentable, baseado en reintegrar residuos orgánicos para que volvan de novo á terra como fertilizante natural e xeren novos produtos en lugar de queimalos ou envialos a un vertedoiro.
O crecente interese pola compostaxe reflectiuse no número de cidadáns que se achegaron para recibir a información así coma na repartición de composteiros individuais facilitados pola Deputación de Pontevedra, xa esgotados nestas datas e que provocaron unha listaxe de agarda de medio cento de familias. O Concello de Cambados, pola súa parte, dispón de dous centros de compostaxe comunitarios en funcionamento e hai previsión para instalar outros catro repartidos pola vila.