Cuntis reinicia as actividades para promover o envellecemento activo
Por Redacción
O Concello de Cuntis reinicia a partir do próximo luns 10 de febreiro un novo programa de actividades dirixido ao envellecemento activo e ao desenvolvemento comunitario da poboación maior.
Segundo a información facilitada pola concelleira de Servizos Sociais, Conchi Campos, o programa levarase a cabo de xeito descentralizado polas diferentes parroquias e lugares do concello e estará dirixido a persoas empadroadas en Cuntis.
Os obradoiros integradores que se desenvolverán por todo o municipio comprenderán actividades manuais como manualidades, restauración, pintura ou bordados.
O departamento de Servizos Sociais tamén promove talleres de ximnasia de mantemento dirixidos a persoas maiores de 55 anos empadroadas en Cuntis. Serán os mércores e os venres no pavillón do colexio de 16.00 a 17.00 horas e de 17.00 a 18.00 horas.
Os obradoiros de memoria e estimulación cognitiva diríxense a persoas maiores de 55 anos ou persoas que por prescrición médica indiquen a necesidade de participar nesta actividade e desenvolveranse por 10 locais, escolas unitarias e centros sociais das parroquias de Cuntis, así como no Centro Patelas.
A concelleira informa que todas aquelas persoas que non participaran no ano 2019 poderán realizar a correspondente solicitude no Departamento de Servizos Sociais do Concello. Para máis información poden chamar ao 986185468.