O establecemento SICTED máis competitivo de España 2019 está no Grove
Por Redacción
Un cámping de San Vicente do Grove, o Paisaxe II, recibiu este xoves o premio ao Establecemento SICTED máis competitivo de España 2019 na Feira Internacional de Turismo (FITUR), que concede a Secretaría de Estado de Turismo.
Para a concesión deste galardón atendeuse a súa competitividade, a mellora continua e o servizo aos clientes. Este cámping leva 20 anos de actividade no Concello do Grove.
Ademais, este establecemento recibirá durante a noite deste 23 de xaneiro o distintivo Q de Calidade, que renova anualmente ao terse en conta a participación activa do cliente na mellora das instalacións, a profesionalidade do persoal e a garantía de calidade dos produtos e servizos.
Neste sentido, este negocio ten en conta a pegada ecolóxica, a diminución do impacto ambiental e a utilización de enerxías renovables, ademais da concienciación ao turista sobre a reciclaxe e o coidado dos areais e dos recursos naturais.