Medio Ambiente colaborará co Concello de Marín na humanización da rúa da Estrada
Por Redacción
Algo máis de 359.000 euros vanse investir na reforma urbana da rúa da Estrada, en Marín, unha vía situada entre as rúas de Méndez Núñez e Concepción Areal. Será a través dun convenio que Medio Ambiente vén de asinar co Concello para que ambas administracións asuman o custo desta humanización.
Será con cargo ao Plan Hurbe da Xunta, segundo trasladou o goberno galego tras a sinatura do acordo entre a conselleira Ángeles Vázquez e mais a alcaldesa María Ramallo.
A Xunta comprométese a asumir o 70% do custo da actuación e o Concello a achegar o 30% restante. Concretamente, a consellería de Medio Ambiente, Territorio e Vivenda prevé unha achega de 251.361 euros en 2020 e o municipio, de 107.726,15 euros.
Esta actuación de reurbanización e humanización incidirá nun tramo desta vía, unha das máis frecuentadas do núcleo urbano xa que está ao carón do Concello, alberga a sede da Policía Local e ten moi cerca dous centros escolares.
A súa fisionomía, dun ancho medio actual en torno aos 11 metros, incluíndo o estacionamento nas dúas beiras, caracterízase polas beirarrúas estreitas. A reordenación do vial basearase na eliminación dun dos carrís de estacionamento, concretamente o da marxe esquerda, gañando desta forma espazo para aumentar as beirarrúas.
Desta maneira, as beirarrúas pasarán a contar cunha amplitude de 2.70 metros en ambas marxes. A calzada tamén contará con 3.30 metros de espazo, cun único carril de circulación, respectando o actual fluxo rodado do viario.
Por outra banda, os actuais servizos municipais que discorren pola rúa, como son o abastecemento e a rede de saneamento separativa están "en moi mal estado de conservación e funcionamento", segundo indica o informe técnico do proxecto.
Desta forma, a humanización servirá para renovar toda a canalización, así como os elementos do alumeado público, que tamén presentan un mal estado e contan con luminarias de baixa eficiencia enerxética.
A obra, que forma parte deste plan para acadar un urbanismo responsable e apostar pola recuperación das vilas e cidades galegas, sairá a licitación nos próximos días.
Con cargo a este Plan Hurbe, executáronse en 2018 as obras de humanización da Travesía Jaime Janer, cun custo de 149.719,16 euros.