Unha rotonda e unha senda peonil. É a solución que vén de presentar a Xunta de Galicia para resolver os problemas de tráfico e mobilidade que se rexistran na PO-542, en Pazos (Marcón), diante do coñecido Bar Emiliano e nos accesos ao campo de fútbol do Carrasco.

O proxecto que a Consellería de Infraestruturas sacou a exposición pública prevé mellorar a actual intersección en cruz, reducir o número de xiros á esquerda cara Pontevedra e diminuír a velocidade do tráfico neste tramo. Ademais, tamén se reordenará o espazo público

A rotonda deseñada polos técnicos da Xunta terá dous carrís de catro metros de longo e beiravías dun metro o que, segundo o goberno galego, permitirá reordenar este cruzamento da PO-542 coas estradas provinciais EP-0003 e EP-0004.

A súa disposición permitirá que as traxectorias dos vehículos non se crucen senón que converxan e diverxan de xeito rotatorio, reducindo o número de conflitos.

En canto á senda peonil e ciclista, executarase entre os puntos quilométricos 4+700 e 5+600 e apoiarase na glorieta proxectada, manténdose a parada de bus onde se instalarán dúas marquesiñas de autobús, segundo o novo deseño da Axencia Galega de Infraestruturas.

A obra ten un orzamento de 750.000 euros, avanzou o delegado territorial da Xunta, José Manuel Cores Tourís, que visitou a zona este mércores acompañado, entre outros, polo xefe territorial de Infraestruturas, José Luis Díez, e o xefe da Axencia de Infraestruturas en Pontevedra, Manuel Ángel González Juanatey.