Os hoteis de Sanxenxo rexistraron en setembro un récord de pernoitas
Por Redacción
Segundo os datos do Instituto Nacional de Estatística (INE) os hoteis de Sanxenxo sumaron 122.971 pernoitas en setembro, superando en 1.700 a cifra do ano pasado e en 4.022 o dato de 2017.
Atendendo aos datos dos últimos 7 meses (o INE non publica datos de xaneiro e febreiro) este ano 2019 atópase preto de superar o récord que supuxo o ano 2017.
Así, este ano, desde marzo a setembro, Sanxenxo suma corenta e nove mil pernoitas máis que no mesmo período de 2018.
O cuarto trimestre do ano e, especialmente as pontes, van ser clave para comprobar se 2019 é capaz de igualar e mesmo superar as cifras do ano récord 2017. O que xa é seguro é que superará amplamente os datos de 2018.
Outra das conclusións que se derivan dos datos dos tres últimos anos é que a tempada de alta ocupación hostaleira xa non se limita aos 2 meses de hai dúas décadas, abarca os 4 meses do verán.