Pontevedra estivo presente esta mañá no foro "Movemento Urbano. Conectando resistencias e alternativas" celebrado este domingo en Bruxelas e organizado pola Fundación alemá Rosa Luxemburgo.

Segundo informou o Concello, a concelleira de Promoción da Cidade, Anabel Gulías acompañada do concelleiro do Rural e Xuventude, Alberto Oubiña, participou neste encontro internacional como un dos relatorios principais que abordaba os sistemas alternativos de automóbiles nos centros urbanos.

Xunto a activistas e profesionais de ordenación do territorio, "Pontevedra expuxo as actuacións exitosas que teñen posto á cidade como referente mundial", agora enmarcadas dentro da campaña Efecto PO2 que impulsa o Goberno local dende este mandato.

Na quenda de preguntas, Anabel Gulías tivo que responder a cuestións relativas á importancia de manter o contacto veciñal nas tomas de decisións, así como a determinación política de levar a cabo un cambio radical nas cidades, onde vive a maior parte da poboación mundial.

A presenza de Pontevedra en foros internacionais tivo esta semana unha actividade destacada coa participación en distintos eventos celebrados en Andorra, Porto e, finalmente, Bruxelas.