Deteñen un vilagarciano por traficar con cristal, unha das drogas sintéticas máis perigosas
Por Natalia Puga
A Policía Nacional de Vilagarcía detivo un veciño desta localidade de 29 anos de idade como presunto autor dun delito contra a saúde pública tras ser localizado en posesión duns 800 gramos de cristal ou metanfetamina, considerada unha das drogas sintéticas máis perigosas debido ao seu gran poder de adicción e os efectos nocivos para a saúde.
A detención desenvolveuse no marco dos controis policiais móbiles orientados á prevención e persecución de determinadas actividades delituosas, tales como transporte en vehículos de substancias estupefacientes, e/ou traslado de obxectos de procedencia ilícita.
Os feitos aconteceron durante a tarde do xoves 4 de xullo. Os axentes integrantes dun destes controis policiais observaron como o condutor dun turismo, ao decatarse da presenza policial, realizou unha brusca manobra para eludilos. Cruzou a liña continua da media facendo un xiro de 180 graos e poñendo en serio perigo os ocupantes dos vehículos que circulaban en sentido contrario.
Con esta manobra introduciuse por unha vía secundaria. Os axentes en vehículos policiais rotulados iniciaron a súa persecución, dándolle alcance nas inmediacións, nunha rúa sen saída. Nese momento, o condutor e único ocupante do vehículo, baixou apresuradamente deste, portando nunha das súas mans unha bolsa que botou entre unhas matogueiras, e emprendeu unha veloz carreira.
Os policías perseguírono e un deulle alcance. A continuación, inspeccionaron a bolsa e comprobaron que no seu interior había dous paquetes que contiñan un produto en forma de anacos de cristal, substancia que pola súa forma e aspecto todo parecía indicar que se trataba do tipo de droga sintética coñecida vulgarmente como cristal e cuxo nome científico é metanfetamina.
Os axentes procederon á detención do citado mozo como presunto autor dun delito contra a saúde pública por tenza de substancia estupefaciente, ademais da intervención do vehículo utilizado para transportar a referida substancia. Posteriormente, realizaron un rexistro no domicilio do detido onde se interveu máis substancia estupefaciente.
Ao atoparse cun control policial, cruzou a liña continua, deu un xiro de 180 grados e puxo en risco o resto de condutores
Na casa do detido tamén se interviñeron outros efectos como tres básculas de precisión, varias follas manuscritas con anotacións, dúas axendas de teléfonos, dous teléfonos móbiles con varias tarxetas SIM e numerosos recortes de plástico supostamente utilizados para dodificar droga.
Unha vez pesada, a substancia botou un peso bruto aproximado de 800 gramos. De confirmarse a súa autenticidade e grao de pureza, trataríase dunha importante operación contra o tráfico desta substancia estupefaciente. Signifícase que debido ao seu gran poder de adicción e os efectos nocivos para a saúde, se lle considera como unha das drogas sintéticas máis perigosas.
O detido, a droga e os efectos intervidos foron postos a disposición do titular do Xulgado de Instrución número tres de Vilagarcía de Arousa, en funcións de garda, ao longo da mañá deste venres.