Baleiran os colectores de papel de Poio para localizar un expediente médico que roubaron nun coche e logo tiraron
Por Natalia Puga
O persoal da empresa que realiza o servizo de recollida de lixo en Poio colaborou coa Garda Civil de Pontevedra na localización dun expediente médico de suma importancia persoal que fora roubado do coche do seu propietario e, posteriormente, tirado ao lixo. Foi recuperada, pero para logralo, tiveron que baleirar os colectores de recollida selectiva de papel.
Os feitos aconteceron a raíz dun roubo rexistrado o 23 de xuño no interior dun vehículo. O ladrón que posteriormente foi detido subtraeu diversos efectos persoais e unha carpeta azul que contiña o expediente médico citado.
Os axentes realizaron as pescudas oportunas co fin de localizar a mencionada documentación e tiveron coñecemento de que fora botada nun colector de papel, de modo que se procedeu, coa colaboración de persoal de recollida de papel da empresa contratada polo Concello de Poio, ao baleiro dos contendores. Tras varias horas de busca, foi localizada e será entregada ao seu propietario.
Nesta mesma investigación, a Garda Civil detivo o veciño de Soutomaior de 29 anos F.P.T. como presunto autor do roubo e lle imputa outro delito de roubo no interior do mesmo vehículo denunciado o pasado 15 de xuño.
O propio detido recoñeceuno en presenza do seu avogado e, tras prestar declaración na Comandancia da Garda Civil, quedou en liberdade con cargos coa obriga de comparecer no xulgado cando sexa requirido.