Pillan unha veciña de Sanxenxo cometendo un delito de tráfico por terceira vez en menos de dous meses
Por Natalia Puga
A Garda Civil imputou un delito contra a seguridade do tráfico a unha veciña de Sanxenxo cazada conducindo un vehículo tras perder todos os puntos do carné. Trátase da terceira detención por este mesmo motivo en menos de dous meses.
Segundo informou a Garda Civil de Pontevedra, a imputada é J.M.V.P., unha veciña de Dorrón de 45 anos que serán sometidos a un xuízo rápido este venres 5 de xullo no Xulgado de Instrución número 2 de Pontevedra.
Unha patrulla da Garda Civil realizaba labores de prevención da seguridade cidadá na zona A Porteliña (Poio) cando observou circulando un turismo Citroen Saxo. Ante a presenza dos axentes, a condutora realizou unha manobra evasiva do lugar pola rúa Anafáns.
Aos poucos minutos, os axentes localizárona camiñando nas inmediacións e, tras proceder a un rexistro superficial dos obxectos que portaba, encontráronlle a chave do vehículo que conducía, sendo localizado este a escasos 300 metros do lugar.
Efectuada identificación e verificación da situación do seu permiso de condución, séguelle constando unha perda de vixencia deste por carecer dos puntos asignados, sen realizar curso de reeducación e sensibilización vial.