O renovado multiusos da Xunqueira, preparado para o inicio dunha nova tempada deportiva
Por Redacción
Coincidindo co inicio dunha nova tempada deportiva, o Concello de Pontevedra quixo saldar a súa débeda pendente co pavillón multiusos da Xunqueira. A súa reforma integral, completada na pasada primavera, quedara sen inaugurar. Ata este sábado.
Nun acto no que participaron un cento de nenos das escolas deportivas de varios clubs da cidade, o alcalde de Pontevedra, Miguel Anxo Fernández Lores, e o responsable de Deportes, Tino Fernández, cortaron a cinta simbólica desta renovada infraestrutura deportiva.
Cada fin de semana este pavillón é empregado por uns 1.500 deportistas. Nel adestran e xogan equipos de fútbol, voleibol, balonmán, baloncesto ou fútbol sala.
A reforma do multiusos, que contou cun investimento de case dous millóns de euros, foi financiada polos Fondos Europeos de Desenvolvemento Rexional (FEDER) concedidos á Estratexia de Desenvolvemento Urbano Sostible e Integral de Pontevedra.
O interior desfíxose case na súa totalidade para dar paso a un polideportivo máis operativo e funcional. Consta de dúas canchas, novas gradas móbiles, maior amplitude de servizos, acceso directo para o alumnado do instituto A Xunqueira II, un ximnasio máis amplo e mellor equipado, ou vestiarios para servizo do propio pavillón e dos campos de fútbol próximos.
En total, hai dezanove vestiarios cunha capacidade media dunhas 20-30 persoas, co que existe unha capacidade de operación cómoda para arredor de 400 deportistas simultaneamente.
O novo edificio refixo integramente a cuberta con illante térmico ata o de agora inexistente e impermeabilizouse dando solución aos problemas de humidade.
Ademais, instalouse nova carpintería metálica e un novo acristalamento específico para acadar ese illamento, renováronse os servizos de electricidade, alumeado ou fontanería, renovouse todo o sistema de calor con novas caldeiras e mellorouse a súa accesibilidade, eliminando barreiras, instalando un novo ascensor e construíndo aseos adaptados para o público.
Relacionadas:
-
Deportes ultima a renovación da pista do Municipal e a cuberta do Multiusos
Por Alejandro Espiño |
-
Proteccións para as columnas do renovado pavillón Multiusos
Por Redacción |
-
O Campionato Galego Infantil de voleibol, estrea competitiva para o Multiusos da Xunqueira
Por Redacción |
-
O Multiusos da Xunqueira reabrirá o vindeiro luns 1 de abril
Por Diego Espiño |
-
O novo multiusos da Xunqueira "con animaliños" estará listo a mediados de xaneiro
Por Oskar Viéitez |