Os supostos homes de palla do narco falecido José Lafuente chegan a xuizo e negan branqueo de capitais
Por Natalia Puga
Tres meses e medio despois da morte por enfermidade do narcotraficante José Lafuente Martínez, membro do clan arousano de 'Los Madeireros', a súa viúva, o seu sobriño e un suposto home de palla sentáronse este martes no banco dos acusados da Audiencia de Pontevedra para render contas por un delito de branqueo de capitais. Nesta causa o principal acusado era o falecido, pero o fiscal sostén que estes tres procesados lle axudaron a branquexar diñeiro da droga e o seu sobriño tamén a introducir cocaína en España.
A ausencia de Lafuente descafeinou a vista e tamén a negativa de dous dos tres procesados a responder ás preguntas do fiscal. Ningún deles recoñeceu ningunha vinculación co tráfico de drogas nin actividades ilegais para branquexar diñeiro negro.
Malia todo, a súa relación coas actividades do falecido poden verse reflectidas, a xuízo do fiscal Antidroga, Luis Uriarte, nas conversas gravadas do teléfono do líder, que estivo meses intervido. Este martes léronse na vista na Sección Segunda da Audiencia, así como a declaración do propio Lafuente en fase de instrución.
A viúva, María Dolores T.C., para quen o fiscal reclama 5 anos por branqueo de capitais, tan só declarou a preguntas da súa defensa e non aclarou ningunha relación co branqueo de diñeiro. O outro suposto home de palla que tampouco respondeu ao Ministerio Público foi Benigno S.C., para quen tamén piden cinco anos por branqueo.
O sobriño do procesado, Eladio L.A., ao que se acusa de tráfico de drogas e branqueo e se pide unha pena de dez anos de cárcere, si atendeu ás preguntas, pero tan só respondeu que cría que as transaccións económicas que realizaba para Lafuente eran legais. Asegurou que cando o falecido comezou a relación a súa viúva en 1997 xa tiña o mesmo nivel de vida que durante a época na que lle investigou a Garda Civil por branqueo.
O fiscal sostén que branquexaban diñeiro procedente do tráfico de drogas derivándoo a contas en Portugal ou en paraísos fiscais
O fiscal sostén que Lafuente, coa colaboración dos outros acusados como os seus homes de palla, branquexaba diñeiro procedente do tráfico de drogas derivándoo a contas en Portugal ou en paraísos fiscais como Macao, Las Bahamas ou as Illas Caimán ou comprando propiedades como o chalé no que vivía en Meaño. Chegou a branquexar ata nove millóns de euros.
Un axente da Garda Civil que participou nas investigacións da operación Sisana na que foron detidos asegurou que o papel de Benigno S.C. e Eladio L.A. era o mesmo, acudían a Suíza a recoller diñeiro que supostamente branquexaba Lafuente. Eladio L.A., ademais, tiña, xunto á procesada e o seu defunto marido de contas en Portugal.
O xuízo continuará o próximo xoves 4 de xullo. Xa estaba previsto celebrarse en febreiro, pero suspendeuse ao encontrarse Lafuente hospitalizado. En marzo faleceu sen render conta polos dous delitos contra a saúde pública, un de branqueo de capitais e outro de tenza ilegal de armas polos que o fiscal pedía que fose condenado a 22 anos de cárcere. Antes de falecer pasou polos xulgados e o cárcere polo secuestro do seu sobriño José Radío na súa casa de Sisán (Meaño) e por tráfico de drogas (por un tribunal portugués). De feito, cando foi detido pola causa pola que se acusa agora levaba pouco tempo en prisión.