Invisten máis de 25.500 euros en material e aparataxe en varios centros de saúde
Por Redacción
A Xerencia da Área Sanitaria de Pontevedra ven de investir máis de 25.500 euros na adquisición e distribución de diverso material e aparataxe asistencial, técnico e terapéutico para as especialidades de Odontoloxía e de Fisioterapia, con destino a varios centros de saúde da súa rede de Atención Primaria.
Nas vindeiras datas distribuirase entre os centros de saúde de A Parda e Lérez en Pontevedra, Marín, Bueu, Vilalonga en Sanxenxo, Vilagarcía de Arousa e Cambados material asistencial de Odontoloxía con equipamento técnico específico. Trátase de: pinzas, separadores, fórceps odontolóxicos, luxadores, elevadores bucais, xeringas anestésicas, bisturís odontolóxicos, espellos bucais de aumento, sondas periodontáis, por valor de 14.489 euros.
Complementariamente, entre os centros de saúde de Baltar en Sanxenxo, A Parda e Lérez en Pontevedra, Marín, Bueu, Vilagarcía de Arousa e Cambados distribuiráse material asistencial para efectuar técnicas e terapias da especialidade de Fisioterapia.
Son: estimuladores dixitais transcutáneos, camillas hidráulicas, cabezais aplicadores de ultrasóns, colchonetas de alta densidade, aparatos de tracción cervical, entrenadores de equilibrio, balóns especiais de fisioterapia, etc- cun orzamento que acada os 11.054 euros.