Un accidente volve provocar retencións de tráfico na AP-9 ao seu paso por Poio
Por Diego Torrado & Redacción
Se a fin de semana pasada unhas obras de mantemento na autoestrada provocaban colapsos circulatorios nos accesos á cidade e retencións de tráfico na AP-9, este xoves 25 de xullo, festividade de Galicia, repetíase a situación ao redor das 11.45 horas.
O impacto de dous vehículos na ponte da autoestrada sobre a ría provocaba que se rexistrasen colas de vehículos no tramo que atravesa o municipio de Poio con problemas na circulación nas entradas e saídas da cidade na contorna da ponte da Barca e da ponte dos Tirantes.
A Garda Civil de Tráfico acudiu ao momento no que se produciu o accidente. As retencións duraron ao redor de media hora ata que os vehículos foron retirados e se normalizou a circulación.