Axentes da Policía Autonómica veñen de desenvolver un dispositivo especial na zona de Campelo e Combarro, en Poio. Na madrugada do día 20, os axentes contaron coa colaboración dos vixiantes da confraría de San Telmo.

Os axentes localizaron no operativo a dous varóns extraendo bivalvo de xeito furtivo, sendo interceptados cando se dispoñían a abandonar o areal. A ameixa extraída sumaba un total de 25,6 quilos, sendo posteriormente devolta ao mar.

A unidade policial instruíu dilixencias ao tratarse de furtivos habituais que extraen o bivalvo en diferentes puntos da ría sen permiso ou autorización legal, co obxectivo de destinalo ao consumo humano directo sen garantir nin a salubridade nin a trazabilidade alimentaria do produto.

Nos últimos sete días os axentes recuperaron máis de 100 quilos de ameixa extraídos de xeito irregular durante o desenrolo dos dispositivos da loita contra o furtivismo na ría de Pontevedra.