Carmela Silva e Gonzalo Caballero avalan a Javier Dios na presentación da súa candidatura á alcaldía de Vilanova
Por Redacción
Javier Dios presentaba na noite deste luns a candidatura socialista á alcaldía de Vilanova de Arousa nun acto desenvolto no Pazo Vista Real. A lista que se presenta conforma, segundo as súas palabras, un equipo comprometido e responsable co obxectivo de finalizar co mandato do Partido Popular no municipio.
Ao acto de presentación asistía o secretario xeral do PSdG-PSOE, Gonzalo Caballero e a presidenta da Deputación Provincial, Carmela Silva. Javier Dios agradecía á presidenta provincial que lle permitise gañar experiencia na Deputación para afrontar o reto das municipais e destacou o labor levado a cabo polo goberno da provincia durante estes catro últimos anos cun novo modelo de xestión, que definiu como democrático e transparente.
Os socialistas indicaron que ofertan un proxecto para a vila baseado no diálogo e o respecto ás mulleres fronte ao discurso da "confrontación" e do "insulto". Carmela Silva destacou os investimentos que a Deputación realizou en Vilanova cun investimento de 5,3 millóns de euros en catro anos destinados a infraestruturas, emprego e diversas actividades.