Marea Pontevedra confía nunha maioría que lle permita acadar a alcaldía para renovar a política local
Por Redacción
Decenas de persoas asistiron este sábado 6 ás instalacións da Casa da Luz para participar na presentación oficial da candidatura de Marea Pontevedra para as vindeiras eleccións municipais, que se celebrará o 26 de maio.
O cabeza de lista da formación, Luís Rei, dirixíase aos asistentes afirmando que o proxecto que lidera está pensado para maiorías, co obxectivo de defender con alegría e con espíritu renovador a política local. A formación aposta pola renovación, a ecoloxía e polas propostas alternativas.
Rei indicou que durante este mandato exerceron como líderes da oposición malia que non lles correspondía por número de concelleiros. Destacou o contacto que manteñen coa cidadanía para elaborar as propostas que se inclúen en Camiño 19, o programa para gobernar Pontevedra.
Segundo explicaba Luís Rei durante este acto, encabeza o mellor equipo de goberno que Pontevedra pode ter, con Teresa Casal ocupando o segundo posto e con Manuel Fontán asumindo o terceiro lugar da listaxe.
Neste sentido, Teresa Casal criticou que o Concello se teña convertido nunha noria, que só dá voltas ao modelo de cidade. A representante de Marea Pontevedra aposta por un Concello inclusivo e xusto. Pola súa parte, Manuel Fontán anunciou que comeza un novo tempo, con xente do común que desprazará os políticos de toda a vida.
Tamén participou no acto a actual concelleira de Marea Pontevedra, Mari Carme Moreira, que ocupará o último posto da candidatura. Ela amosou a súa satisfacción por ter aprobado a renda social durante este mandato para axudar as persoas con menos recursos económicos.
Relacionadas:
-
Marea Pontevedra incorpora a súa axenda política as demandas de AFAPO
Por Redacción |
-
Marea denuncia que o Concello "asfixia" o deporte local mentres serve unha "gran mariscada" aos de fóra
Por Alejandro Espiño |
-
En Marea reivindica en Pontevedra ser un partido "sen tutelas nin ataduras" con Madrid
Por Alejandro Espiño & Mónica Patxot |
-
Marea Pontevedra presenta un plan para defender as vivendas do lume forestal
Por Oskar Viéitez |
-
Marea presume de equipo "transversal, comprometido e dinámico" para gobernar Pontevedra
Por Alejandro Espiño |