Vai reforzarse o formigón da ponte do Burgo para encastrar a rede de pluviais
Por Redacción
Demetrio Gómez, concelleiro de Obras, mostraba este xoves un anaco da ponte do Burgo para mostrar a utilización de ferro, en lugar de aceiro, que se facía nos anos 50. Durante as últimas semanas, levou a cabo a comprobación da seguridade da pasarela sobre o Lérez.
A ponte estruturalmente atópase en boas condicións, indicou Demetrio Gómez á espera da conclusión do informe. O formigón utilizado no seu momento é de boa calidade e os alicerces presentan algunha pequena apertura que se cubrirá durante a reparación prevista.
Pola súa banda, as canalizacións atópanse moi próximas ao piso e esa situación obriga a que os enxeñeiros e arquitectos municipais coa empresa que acometerá a reforma ideasen un sistema para introducir unha nova canalización de pluviais que se enganche á rede.
Para acometer este traballo reforzarase o formigón actual, de forma que tamén soporte a varanda prevista na reforma e ao mesmo tempo alongarase unha peza por fóra da ponte para instalar a canalización de forma encastrada na pedra. O concelleiro engadiu que esta adaptación da rede pluvial, elaborada por arquitectos e enxeñeiros municipais e a empresa adxudicataria, acometerase na seguinte fase desta obra. Alertou que será necesario realizar cortes temporais de paso pola ponte, que se anunciarán previamente.
O concelleiro nacionalista convidou os pontevedreses a achegarse ata o río para comprobar a imaxe que ofrece a ponte tras a limpeza levada a cabo.
Relacionadas:
-
A renovada ponte do Burgo terá unha varanda deseñada para Pontevedra
Por Alejandro Espiño |
-
Un convenio entre o Concello e a Deputación desatasca o proxecto para iluminar tres pontes sobre o Lérez
Por Natalia Puga |
-
Identifican tres mozos por botar ao río dez valados das obras da ponte do Burgo
Por Alejandro Espiño & Natalia Puga |
-
Críticas pola eliminación da rotonda do Burgo
Por Redacción |
-
A ponte do Burgo, pechada tamén ao tráfico peonil
Por Oskar Viéitez |