San Benito, viacrucis e pregón da Semana Santa
Por Oskar Viéitez
O mosteiro de San Salvador de Lérez celebrou este xoves a festividade de "San Benito de inverno" que coincide o primeiro día da primavera. Esta celebración tradicional reúne a menos devotos que a que se celebra o 11 de xullo na honra ao santo "máis milagreiro".
Este venres ao finalizar a misa das 20 horas, do mesmo xeito que todos os venres de Coresma, a Basílica de Santa María a Maior acolle a celebracíon do Via Crucis debido ao peche do convento das Clarisas.
As estacións do Via Crucis son percorridas por membros da Confraría do Espiritu Santo e compoñentes do coro de excantores dos Institutos de Pontevedra que interpretan os tradicionais motetes, para lembrar os pasos de Xesús no seu camiño ao Calvario ata a súa crucifixión e morte.
SEMANA SANTA
A Xunta Coordinadora da Semana Santa de Pontevedra, ten programados xa os actos previos que se desenvolverán na cidade en próximos días.
O martes 2 de abril, na Igrexa Parroquial de San Bartolomé, terá lugar o pregón da Semana Santa, a cargo do José Luis Dorelle Iglesias, delegado diocesano para os cursos de Cristiandade.