O Día Mundial dos Bosques chega á gardería en Moraña
Por Redacción
Moraña conmemoraba este xoves 21 de marzo o Día Mundial dos Bosques, con motivo da chegada da estación primaveral. A celebración desenvolvíase na escola infantil da Galiña Azul coa plantación dunha decena de árbores froiteiras.
Máis de corenta escolares, as monitoras, un especialista en xardíns e a alcaldesa Luisa Piñeiro encargáronse de realizar a plantación. Desta forma caváronse os ocos para despois trasplantar oito cerdeiras, unha maceira e un peral no xardín da gardería da vila.
Tanto a alcaldesa como as monitoras aconsellaron aos menores sobre a necesidade de regar e coidar estas árbores para que poidan crecer durante os próximos meses. Con esta actividade, o Concello de Moraña quere concienciar entre a poboación máis nova a importancia da natureza e a necesidade de coidar as especies arbóreas.