A Garda Civil denuncia 25 condutores que deron positivo en alcol ou drogas no Entroido da Illa
Por Redacción
O dispositivo especial de tráfico establecido polo Subsector de Tráfico da Garda Civil de Pontevedra con motivo dos actos do martes de Entroido na Illa de Arousa acabou coa denuncia a 25 condutores que deron positivo nos test de consumo de alcol e drogas.
O operativo preventivo de seguridade enmárcase na campaña de intensificación que realiza a Garda Civil sobre o consumo de substancias psicoactivas na rede viaria da provincia de Pontevedra e, neste caso en concreto, os axentes realizaron 532 probas para a detección de alcol e drogas.
Un total de 18 condutores deron positivo en alcol e 7 en drogas. Destes 25, 23 foron denunciados administrativamente e os 2 restantes foron citados para comparecer ante a autoridade xudicial por superar a taxa de 0.60 mg/ l en aire de alcol.
Outro condutor xa fora detido por un suposto delito contra a seguridade viaria, por conducir de forma manifestamente temeraria ao tentar eludir os controis establecidos, poñendo en concreto perigo a vida doutros usuarios da vía.