O servizo de Cardioloxía do CHOP é recoñecido cun selo de calidade
Por Redacción
Uns 50.000 pacientes ao ano son hospitalizados en España con diagnóstico de Scasest, síndrome coronario agudo sen elevación do segmento ST. O diagnóstico e o tratamento axeitados desta patoloxía constitúen un importante reto asistencial que ao servizo de Cardioloxía do Complexo Hospitalario Universitario de Pontevedra veñen de valerlle un selo de excelencia a nivel nacional dada a calidade asistencial de ambos procedementos na área sanitaria de Pontevedra e O Salnés.
A Sociedade Española de Cardioloxía (SEC) fixo este venres entrega deste recoñecemento ao xefe de servizo de Cardioloxía de Pontevedra, o doutor Óscar Díaz Castro, quen se desprazou a Madrid para recoller a distinción nun acto celebrado na Casa do Corazón.
Os síndromes coronarios agudos (SCA) encádranse na actualidade no diagnóstico diferencial dun dos principais motivos de consulta nos servizos de Urxencias, como é a dor torácica non traumática.