Comisións Obreiras asegura que menores do Príncipe Felipe utilizan mantas durante o día para protexerse do frío
Por Oskar Viéitez
O sindicato Comisións Obreiras (CC.OO.) asegura que nalgúns centros da Cidade Infantil Príncipe Felipe "os nenos están con mantas durante o día porque a calefacción non chega a esas estancias".
Por este motivo os responsables de CC.OO. denuncian a "absoluta falta de humanidade" do equipo de goberno da Deputación de Pontevedra e culpan á presidenta provincial, Carmela Silva, de "fomentar a discriminación e a desigualdade máis absoluta cos menores" da cidade infantil "obrigándoos a pasar frío e a correr o risco de padecer enfermidades".
"Se fosen os seus fillos isto non o permitirían", afirman os portavoces sindicais nun comunicado de prensa, na que cualifican de "intolerable" que continúe esta "tortura" denunciada con anterioridade e esixen solucións.
"Lembrámoslle á presidenta e á deputada delegada que a falta de calefacción incrementa o sufrimento dos menores e con iso estase facendo un uso inadecuado do diñeiro público que se gasta en propaganda e en cuestións prescindibles, mentres que, nesta que é básica, afórrase á conta do padecimiento dos máis débiles", reza o escrito de Comisións Obreiras.