20 proxectos empresariais participan na terceira edición do Coworking de Barro
Por Redacción
Este martes empezou a terceira edición do Coworking de Barro, un programa dirixido ás persoas emprendedoras que teñan un proxecto en fase temperá de desenvolvemento ou cunha empresa creada recentemente.
O Coworking de Barro é un programa de emprendemento froito da colaboración entre a Deputación de Pontevedra e a Escola de Organización Industrial e cofinanciado polo Fondo Social Europeo.
Nesta ocasión participarán un total de 20 proxectos seleccionados entre os 32 que presentaron a súa solicitude. Entre as ideas que van participar no programa da institución provincial estará moi presente un sector estratéxico para a provincia de Pontevedra como é o turismo. Amais haberá proxectos vencellados á moda, gastronomía, fotografía, comunicación, psicoloxía ou á actividade física.
No acto de presentación, a presidenta da Deputación, Carmela Silva, subliñou con orgullo que "a provincia de Pontevedra está chea de talento" e resaltou que cada edición do coworking "mellora a anterior, e esta crédeme que é extraordinaria".
Os participantes neste programa gratuíto terán acceso a 100 horas de formación nas que combinarán talleres formativos, dinámicas grupais, titorías individualizadas e expertas e soporte e seguimento do proxecto.