A Policía Nacional investiga a aparición dun cadáver en avanzado estado de descomposición nos antigos terreos de Malvar
Por Diego Torrado & Anxo Lourido
Axentes da Policía Nacional de Pontevedra investigan a aparición dun corpo en avanzado estado de descomposición durante a tarde deste sábado 26 nos antigos terreos de Malvar, no barrio de Mollavao.
Ata este punto desprazábanse varias dotacións da Policía Nacional que encontraban o corpo nun espazo próximo a varias vivendas e naves industriais abandonadas. Un particular alertara á Policía Local da presenza do corpo minutos antes.
Os primeiros indicios indican que se trata dun varón indixente, que tería falecido hai bastante tempo, segundo informan fontes da Comisaría Provincial da Policía Nacional de Pontevedra.
Á espera de que nas vindeiras horas se practique a autopsia e o informe forense permita esclarecer as causas da morte, os axentes policiais non detectaron danos físicos nos restos mortais aparecidos neste recinto.