Aparecen numerosos aparellos electrónicos tirados nun monte de Cuntis
Por Redacción
Aparatos electrónicos e diverso material de gran tamaño. É o contido dos vertidos incontrolados que detectaron uns veciños do lugar de Ferreiros, na parroquia de Arcos de Furcos, en distintas partes do monte.
Axentes da Policía Local de Cuntis acudiron ao lugar para certificar esta cuestión.
Desde o Concello lamentan o "desprezo total" ao medio ambiente e o coidado dos montes do municipio que supoñen este tipo de episodios.
Ademais, recordan que existe un servizo de recollida deste tipo de aparatos porta a porta, que funciona os últimos xoves de cada mes. Os veciños poden levalos tamén diariamente ao parque de maquinaria do polígono industrial da Ran.