Á vista da polémica suscitada a raíz do proxecto da Xunta de Galicia para ampliar a depuradora de Praceres nas inmediacións das actuais instalacións, o Goberno aposta por abrir unha vía de diálogo e facer previamente un "estudo integral" da Ría de Pontevedra. 

Así o indicou este xoves o delegado do Goberno en Galicia, Javier Losada, nunha comparecencia acompañado pola subdelegada en Pontevedra, Maica Larriba, na que quixo aclarar que "non poño en dúbida nin fago ningún tipo de crítica aos proxectos que se presentaron", pero "visto que hai diferenzas de criterio", a súa opinión é que "o normal é que se produza un estudo integral". 

Losada indicou que a aposta do Goberno de Pedro Sánchez, "máis aló de debates partidistas sobre ampliación ou modificación de emisarios e depuradoras", é por abordar unha actuación integral da rexeneración da Ría, con implicación e compromiso de todas as administracións. 

"Hai que facer unha actuación integral e deixarse de discutir sobre ampliacións e modificacións de emisarios", defendeu Losada, que non criticou o proxecto da Xunta, pero si se ofreceu a "establecer un diálogo e un acordo", pois "a Ría de Pontevedra meréceo". Segundo indicou, por parte do Goberno implicaríanse os ministerios de Transición Ecolóxica e Medio Ambiente e a Subdelegación do Goberno.

Losada destacou como un dos grandes logros do Goberno socialista desde a súa chegada á Moncloa fai sete meses que "a conclusión do expediente de Elnosa é unha realidade. Respecto diso, indicou que aínda non hai plans sobre que pasará co terreo que ocupa a factoría clorera en Lourizán, pois primeiro " Elnosa ten que cumprir requisitos" e devolver a zona ao seu estado orixinal e "a partir de aí empezarase a estudar" os destinos da parcela xa liberada.