Os terreos do campo de tiro de Cernadiñas Novas son dos comuneiros de Xeve
Por Alejandro Espiño
A titularidade dos terreos sobre os que se asenta o campo de tiro de Cernadiñas Novas é da comunidade de montes de Santo André de Xeve. Así o determinou o xulgado de primeira instancia número 4 de Pontevedra, segundo desvelou este luns o portavoz do goberno municipal, Raimundo González.
A través da vía xudicial, os comuneiros recuperan a propiedade de parte do monte Cernadas, uns 112.018 metros cadrados, sobre o que a Xunta de Galicia construíu o campo de tiro.
A sentenza declara a nulidade da escritura pública pola que o Concello cedeu en 1973 estes terreos ao Estado para albergar o complexo deportivo. Toda esta zona, en virtude das cesións ás autonomías, acabou en mans da Xunta.
O xulgado, con todo, entende que a documentación achegada pola comunidade de montes acredita "plenamente" que o monte é da súa propiedade, valorando especialmente o testemuño de veciños de idade avanzada que ratificaron esta cuestión.
Ademais, lembra que o monte comunal é "inalienable, indivisible e inembargable", polo que a falta de uso ou aproveitamento por parte dos seus donos lexítimos non faculta a unha administración para facerse coa súa propiedade.
Contra esta sentenza cabe presentar un recurso de apelación antes do próximo 25 de xaneiro, aínda que os servizos xurídicos do Concello entenden que sería "moi difícil" que prosperase, ante a xurisprudencia existente e os contundentes argumentos da sentenza.
Relacionadas:
-
Protesta dos comuneiros contra a Xunta cun peche simbólico do campo de tiro de Cernadiñas Novas
Por Oskar Viéitez & Cristina Saiz |
-
Peche simbólico do campo de tiro de Cernadiñas Novas: "a Xunta está de okupa"
Por Natalia Puga |
-
VÍDEO.- O Campionato de Tiro Policial Virxe do Pilar reúne a 120 participantes en Bora
Por Redacción |
-
Investigan un roubo nas instalacións do campo de tiro de Cernadiñas Novas
Por Natalia Puga |