RADIO.- Apuntes de jazz, primeira incorporación de 2019 á programación de PontevedraViva Radio
Por Redacción
Para comezar o novo ano PontevedraViva Radio inicia a emisión dun novo programa e podcast: Apuntes de jazz. Como o seu nome indica trátase dun proxecto de corte musical, á vez que divulgativo, sobre jazz.
O vigués Pancho Novoa, acompañado do músico e xornalista Tino Domínguez, exercen de cicerones nesta hora aproximada, cada quince días.
Pancho Novoa é biólogo e como músico ten un percorrido que actualmente ocupa como voz e guitarra de Pancho Novoa e C'alambre. Formación que fusiona o blues e a bossa nova e que a comezos do ano pasado autoeditaron 'Regresa o sol' que pode escoitarse en diversas plataformas dixitais.
Como sinala Novoa no primeiro programa de Apuntes de jazz trátase dun formato recomendable para calquera persoa. Tanto para aquelas que queiran penetrarse e coñecer a historia e os nomes propios deste xénero musical, como para aqueles que se consideren fieis ao jazz e as súas derivacións.
A súa primeira emisión en streaming será ás 21.00 horas do sábado, con redifusións o domingo; e o podcast estará dispoñible para escoitar ou descargar.