A friaxe e as xeadas acampan ao longo desta semana nas Rías Baixas
Por Redacción
As xeadas continuarán aparecendo a primeiras horas da mañá durante esta semana nas Rías Baixas. Mantéñense as altas presións situadas ao norte da península Ibérica, deixando un tempo seco e estable. Neste luns, o servizo de Meteogalicia indica que se espera un día de ceos con nubes de tipo alto que non impedirán o paso do sol. As temperaturas sitúanse entre os 0 e os 18 graos, con vento frouxo de compoñente leste.
Este martes manterase con influencia anticiclónica e con réxime de ventos do nordés. Espéranse ceos polo nubrados ou despexados en xeral. Continuarán as néboas matinais en vales do interior. As temperaturas non experimentarán cambios significativos, con formación de xeadas en comarcas do interior e situaranse entre 1 e 18 graos. O vento soprará frouxo do nordés.
O mércores 9, a influencia anticiclónica permanecerá activa. Volverán formarse xeadas e néboas en puntos do interior. O vento soprará frouxo do nordés con temperaturas entre 1 e 19 graos.
As altas presións moveranse lixeiramente cara ao oeste durante o xoves 10 provocando a entrada de aire frío procedente de Europa. O ceo seguirá, en xeral, pouco nubrado ou despexado. As xeadas continuarán sendo xeneralizadas no interior; as máximas tenderán a descender lixeiramente movéndose entre os 2 e os 18 graos. Os ventos soprarán do nordeste, algo máis intensos a partir do mediodía.
De fronte l fin de semana, non se agardan grandes novidades. O vento do nordeste seguirá predominando e ascenderán as temperaturas mínimas mentres que se rebaixarán as máximas para situarse entre os 7 e os 13 graos.