Colectivos animalistas piden que se eviten petardos e cohetes sonoros nas celebracións de fin de ano
Por Redacción
Os colectivos Asociación Animalista Libera e a Fundación Franz Weber lanzan un chamamento á poboación para estas festas de fin de ano. Piden que se evite o uso de petardos, foguetes ou calquera outro artefacto pirotécnico que provoquen malestar nos animais e en persoas que son vulnerables a estas detonacións.
Estas agrupacións indican que hai un incremento de municipios que apostan por accións festivas con "pirotecnia cero" debido ás consecuencias que, por exemplo, exercen os petardos sobre as persoas con Trastornos do Espectro Autista (TEA).
Ademais, os estalidos causan problemas nos animais, tanto domésticos como silvestres, que sofren con horror extremo este ruído. Nalgúns casos, sinalan, chega a provocarlles a morte.
Piden aos gobernos locais que limiten o uso de pirotecnia, impedindo que os particulares ou as propostas públicas organicen actividades con estes artefactos.
Estes colectivos apostan por outras versións "silenciosas", como xa se realizaron no municipio italiano de Collecchio, que emprega fogos artificiais de menor impacto e recreacións de luz e láser, do mesmo xeito que sucede en cidades de Suecia.