A compostaxe é un xogo para os escolares do colexio de Campolongo
Por Redacción
O alumnado de primeiro e segundo curso de Primaria do CEIP Campolongo están a aprender esta semana en que consiste a compostaxe a través dos xogos, charlas e obradoiros do Plan Revitaliza da Deputación de Pontevedra. En total son 150 os escolares que estes días están involucrados en coñecer máis sobre como facer dos biorresiduos un recurso como o compost.
Os xogos propostos polo persoal técnico do Centro de Extensión Universitaria e Divulgación Ambiental de Galicia (CEIDA) son actividades cooperativas e tradicionais adaptados á temática do lixo e que achegan conceptos sobre a compostaxe dun xeito lúdico.
O xogo que máis éxito está a ter é o "xogo da miñoca", no que a mascota educativa do Plan Revitaliza -un verme- vai facendo preguntas aos equipos formados nas clases sobre como se deben compostar os residuos orgánicos, que se debe botar na composteira e que non, onde se debe poñer a composteira, se é preciso remexela ou as características do compost e as súas propiedades, entre outras cousas.
Polo medio do ‘xogo da miñoca’ os escolares teñen que salvar algúns contratempos como, por exemplo, atrasar casiñas ou pasar xogadas sen tirar cada vez que o seu grupo cae na icona de accións negativas para a compostaxe: achegas de pintura, medicamentos, plásticos ou lixo impropio á composteira ou esquecer pechar a tapa desta.
A vindeira semana está prevista a realización de actividades no CEIP A Xunqueira I, así como tamén no instituto Valle Inclán de Pontevedra, onde haberá formación sobre compostaxe que culminará cunha visita a un dos centros de compostaxe comunitaria da cidade de Pontevedra.
Relacionadas:
-
O Xogo da miñoca triunfa entre os escolares de Campo Lameiro
Por Redacción |
-
O PP di que a proba do fracaso do Plan Revitaliza é que Vigo non participa
Por Oskar Viéitez |
-
A Deputación asegura que o Plan Revitaliza reduciu a cantidade de lixo enviado a Sogama
Por Oskar Viéitez & Mónica Patxot |
-
A compostaxe chega a máis dun milleiro de alumnos dos centros de ensino da Boa Vila
Por Redacción |
-
A escola é un dos puntais do Plan Revitaliza de compostaxe
Por Redacción & Paula Sanmartín |
-
Os máis pequenos tamén fan compostaxe
Por Sara López Lago & Mónica Patxot |
-
Un convenio para involucrar a todos os colexios e institutos da provincia na compostaxe
Por Diego Espiño |