Tregua meteorolóxica ata metade da semana
Por Redacción
A segunda semana do mes de decembro iniciarase nas Rías Baixas cunha tregua meteorolóxica e temperaturas altas para a época do ano.
Segundo a previsión de Meteogalicia, alternaranse as nubes e os claros con momentos pouco nubrados ou despexados e só ocasionalmente moi nubrados durante o luns 10 de decembro, con máximas que chegarán en Pontevedra aos 19 graos e mínimas que se sitúan nos 11 graos.
A situación manterase relativamente estable na xornada do martes, aínda que con posibilidade de que se produzan precipitacións durante a tarde.
Esa tregua relativa chegará á súa fin o mércores 12, momento no que Galicia entrará nun período de inestabilidade atmosférica e verase influenciada polas borrascas que circulan polo Atlántico Norte e que afectarán de maneira sucesiva.
Desta forma o panorama desde a metade da semana será de ceos nubrados e choivas intermitentes que previsiblemente chegarán ata a fin de semana. As temperaturas pola súa banda seguirán sendo suaves, con máximas que chegarán aos 15 graos e mínimas que non baixarán dos 10 graos.
Consulta a previsión do tempo de Meteogalicia para a semana que entra.